無賴

我自問不是慈悲為懷的記者，遇上無賴被訪者，會跟他鬥爛，反唇相譏，然後將對方的無賴行徑當笑話講。當我遇上海洋皇宮的趙姓股東時，無賴得令我大開眼界，是經典中的經典。

我還記得周五晚，經濟發展及勞工局常任秘書長張建宗狠批海洋皇宮僱主不道德時，我致電那名趙姓股東，他立即連珠爆發：

「小姐，我梗係唔係不道德，我入股22個月投資了幾百萬，現在什麼都無呀，點算不道德呀，

「如果我無良，我一早已炒了所有員工喇。今次件事係九倉(酒樓舖位業主)問題，九倉不續租引致酒樓損失，人地唔畀缽頭我，又怎會乞到錢給班伙記呀，小姐，你話係咪嘞？」

「你繼續講啦，」我唔認同佢，但又驚佢收線，唯有拖住先。大佬，有錢開新酒樓，都唔俾遣散費，仲叫做有良心？我都係第一次見。

他隨即向我詐型：「小姐，你又不來酒樓，你東問一忽西問一忽，我點答你呀，人地XX日報同Y周刊都同我在酒樓，做足1個鐘訪問啦。」

「趙生，你睇清楚XX日報明日點樣寫你，先至同我講啦，」叫我夜晚9點幾來酒樓？我還要交稿架，睬你都傻。

「我唔怕人地點寫我，寫衰我咪寫衰我囉，」趙姓股東答得夠爛。如此爛撻撻，同佢鬥爛都無意思，都係趕快問完我的問題，走為上着。

「點解你找個買魚的做酒樓新股東？」海洋皇宮在三月換走舊股東，換上一個姓范在石峽尾街市買魚的女人，她是唯一知道名字的股東，被友報稱為買魚阿嬸管酒樓。

「佢係我老婆嚟架，點解唔得先？」嘩，我差點噴飯，簡直係反高潮的笑話，我忍着笑再問他：

「政府話考慮將唔俾遣散費的東主列入黑名單，你驚唔驚呀？」

「哼，任它列黑名單，要斬要劏我都無辦法。」江湖爛佬舌戰斯文女記者，就此了結。

想起我在海洋皇宮最後一晚，要親自「落場」採訪，不免要同趙姓股東打照面，我有點擔心，到時又再忍不住噴飯噴茶。

*****

反日浪潮掩至，星期日你會唔會去示威？我屆時有訪問，再者即使要採訪示威，我也只是採訪者，不是參與者，更加不可以舉牌喊口號，這是記者的基本原則。

因為反日，內地同胞難得可以上街，享受短暫的示威自由，可惜暴力掟石，被人口實，也許他們是乘機發洩居多，但我也不贊成用暴力解決。

我訪問過一名日本太太。她說，她小時的歷史課，提及南京大屠殺之後，就會話美國轟炸廣島，輻射引致的創傷到現在仍未復原，暗示美國殘忍。於是，她小時便會覺得，為什麼美國要害日本，對於日本侵華的殘忍，是一瞬即過。

日本太太的爺爺是大學教授，反對軍國主義，要灌輸正確的歷史觀，便教她不能忘記日本侵略亞洲，後人要為這些國家作出補償。所以日本太太從爺爺處，看了很多史料，終於知道日軍從前的殘酷。

通常在海外的日人，較反對日本右翼勢力，傾向接受日軍侵華的不光采歷史。當我看到有線電視直擊日本(噢，這就是我渴望做的報道啊)，找到扶桑社那本歷史教科書，叫南京大屠殺做「南京事件」，還找來一個日本大學授東中野修道，佢居然大大聲聲話南京大屠殺沒根據，質疑南京大屠殺相片是偽造，這人還出了書，我真係睇到眼火爆。

南京事件，六四事件，隔一個海域的中日政府，面對自己的錯失，都係咁卸膊塞責不肯認錯。

*****

無賴，人類的劣根性，無奈地，千秋萬代相傳。