Wednesday, March 02, 2005

阿董起身

阿董又唔係女人,竟然俾霍老形容佢「任勞任怨」,好易被人聯想到,他是隻只懂死做爛做的牛。也不知是好是壞。

阿董這種上去神(做政協副主席然後辭職)的走法,真係好令人意外。其實阿董走人的傳聞,由上周五已開始流傳,但一直無人證實,直至星期二,接近中央人士們知道中央心意,要先放料讓公眾消化消息,香港傳媒亦因而得悉,阿董今舖真係要告老歸田。

也因此,幾乎所有報紙星期三的頭版,都係阿董起身囉!

個個都話唔鍾意阿董,唔知有無人真的會坐言起行,開香檳慶祝呢?

可能,最開心的人係即將接任的煲呔,發夢都會陰陰嘴笑。

對於我來說,阿董起身的最直接得益是,以後也不用聽他那些冗長無比,又無抑揚頓挫,毫無新聞點的演說。毋須想到頭爆, 也不知寫什麼新聞.

最大的故事可能是,究竟阿董係有自知之明辭職,還是胡溫嫌佢「查找不足」不力,要佢走人。Well,這將是特區永恆的秘密。

這個禮拜都唔會有人證實阿董起身的了.想聽到阿董親口say goodbye?耐心一點,等到下個禮拜啦。

不過, 可能大多數小市民覺得不外如是,阿董走又點,咪一樣要生活, 一樣咁難捱!

10 comments:

Male said...

I'll 開 Krug 香檳慶祝 if the rumour is confirmed

cuiyao said...

阿董走係好,但我唔想bowtie坐兩年。我唔想一寫佢0的衰0野,就收到佢個新聞官電話!煩到死,係又投訴唔係又投訴。

tungpo said...

煲呔佬的事,講就完全無問題,寫就差一點!:)

cuiyao said...

講開煲呔,數年前有單小道消息幾有趣。話說官台有高層親自出馬同佢做專訪,同時間feed 返官台之餘官台又同時 feed 去幾個電視台。
話說訪問完0左,係完0左之後,有人開紅酒飲。0甘個cam man 停0左個 cam recording,但唔小心冇停個 feed。於是乎後來煲呔同眾人0既對話就傳晒去各電視台。期間佢唔知講開0的乜,拿住杯酒笑騎騎0甘講0左句︰「呢次香港想窮都難囉。哈哈哈哈。」
有0的台用0左呢條supposed 係私人對話0既 byte,煲先生大怒,官台高層因而接 warning letter。

tungpo said...

Warning letter好濕碎,有效期只一年。

Jonathan said...

但好似我那天放工同阿媽講, 阿董唔做喇, 聽日你睇報紙啦~~佢那個愕然既反應,足以證明,香港既天空, 唔係屬於我地, 要變天, 上頭一句就可以, 無論我地搞幾多野, 點努力去諗政改, 都係徒勞
令我想起齊天大聖孫悟空, 就算以為自已好醒, 都係走唔出佛祖既手指山

Male said...

煲呔 is a snobbery man!!!!!!!!!!!

Florence said...

似乎大家唔係咁鍾意煲呔,不過空穴來風,未必無因,我聽到關於煲呔的故仔,十件有九件都係負面野.煲呔治港會點?我唔知,我只知到佢以前好容易俾人影到佢黑口黑面.

至於阿董,今日陳永棋話佢有病,睇怕都係俾佢的下台階.唉,老人家安心揍孫咪幾好.

更加憂心的是,如果阿董真係俾中央殘酷一叮,先至被迫執包袱,咁香港俾人叮得一次,就會有第二次.若果中央看不順眼,真的拿出個大叮叮來祭旗,唔聽話的香港人,隨時會被殘酷兩叮(零七普選),三叮(第廿三條),四叮(平反六四)......

tungpo said...

話時話,我撞過煲呔幾次,都係口黑面黑。

怪人道格 said...

董生有病都好的,至少我覺得近來人們談起他時都客氣了不少,見風駛舵,多了稱讚他過去七年任勞任怨。但是, 他病得太"明顯"了, 前天人們不覺得他有病, 今天人們卻眾口一詞說他有病,並由一個企都企吾穩的人說董生企半句鐘就累.....

我覺得誰人做特首都不重要,因為現在的黑馬白馬都好像沒有魄力創新的感覺,或是很?x#@,所以人選最緊要順眼,像唐生日夜笑臉迎人就很倒胃。

Related Posts Plugin for WordPress, Blogger...