Saturday, August 01, 2009

「竊聽風雲」小蝦碌

 

本欲續寫中斷兩周的歐遊點滴,有見電影「竊聽風雲」是近期熱話,恰巧讀到明報財經版報道「竊聽風雲」內,吳彥祖借孖展炒股一段出現疑似「蝦碌」,不禁分心。

 

我未看「竊聽風雲」,以僅有的財經常識推算,假若吳彥祖在片內果真借到500萬孖展,他應該起碼有過百萬現金或市值股票在證券行(這樣才能抵押借錢),意味他有一定財力,不致於窮途末路吧。特此轉載該文,公諸同好,若我推斷錯誤或有不足之處,煩請指正,增加觀影趣味,謝謝。

 

***************

明報財經網      2009年7月31日

欄目:小琴密語

《竊聽風雲》唔多熟財經 吳彥祖借巨額孖展炒股

 

【明報專訊】小琴噚日一早就入戲院,睇新鮮熱辣登場暑期勁片《竊聽風雲》。套戲內容講警方調查股票做市內幕,小琴身為財經記者,自然好想先睹為快。



        套戲講到飾演警員吳彥祖、古天樂,查案期間聽到內幕消息,話隻股票風華國際由0.2元炒到1.2元,佢即刻去證券行開戶口。當時仲未開市,已經有批小股民好似返工咁,坐定定證券行專用,織冷衫、念佛經等開市,都幾似平日證券行情。



證監主動叫停牌 近年罕見

        不過,做阿頭劉青雲叫兩個下屬唔好犯法。但吳彥祖話已經借500萬孖展入市,返唔到轉頭,古天樂就全副身家20萬博一舖。後來隻股真係猛咁升,成間證券行股民都跟住入市,不過升到0.8元就停市。後來新聞報道話證監會見風華國際升到好唔尋常,要求停牌。《竊聽》係部好戲,之不過,香港編導一向編寫財經劇情時有欠嚴謹。首先係香港地,證監當然試過叫上市公司停牌,但十幾年來都唔係隨便咁做,通常都係要港交所出面,然後又要上市公司去負責,話係「應公司之要求而停牌」。



       好,就算證監真係出面,罕有情出現,吳彥祖借孖展炒隻風華國際,  借500萬孖展,都罕有。今時今日,香港股市同70年代初,甚至跟97年前都好唔同,借孖展通常係去抽新股,一般借孖展去炒股,要扺押,例如有1000萬元匯豐倉,或可按到500萬銀去炒其他股,當然個別華資行願意拿物業做抵押,但都唔普遍。



        其實,小琴都係恨鐵不成鋼,若果《竊聽》搵個識財經界事務人做編審,補多一兩個鏡頭,交代上述情,這套片的說服力肯定仲強。不過,據小琴觀察,觀眾都好少理,睇到好入戲,總之好睇。

4 comments:

Anonymous said...

"Show me~~ the money..." XX財務幫到你? 吾使睇入息就可以借錢?

抑或是先借貴利再借孖展?

補充: 吾係隻隻股票都可以做孖展, 即使做都未必做得大, 孖展槓桿太細又好似冇乜用. 證券行要考慮借出的錢收吾收得番, 所以一個吾該要斬倉, 有沒有巿場深度是好緊要, 沽吾到, 隻股票升了十個開又有鬼用咩; 隻股票質素吾好太差, 陣間一個吾該倒閉/ 長時間停牌, 便會變得好麻煩,好彩就謝瑞麟, 吾好彩(211)每年收$50惠康購物券紅酒...

~enigma

Florence 黎凱欣 said...

Enigma, 對啊, 孖展唔係你想借就借到, 我未睇竊聽風雲, 如果真係蝦碌在此, 咁就幾無奈, 點解資料搜集咁粗疏, 香港話晒都係金融之都嘛。

駒 said...

其實部戲無講吳彥祖點解借到500萬,所以好難話編劇粗疏,最多話佢無交待。至於股價升到停版,就真係異於香港股市的實況。

不過我就算編劇真係唔了解股市運作,只要唔好太離譜,我都唔會好介意。話晒個故事都係虛構o既。

其實好多戲都係咁。如果妳睇《A1頭條》,可能都會覺得編劇完全唔了解傳媒運作(例如一個o靚仔攝記可以三更半夜直接打電話俾老總)。但只要唔好當佢係寫實故事咁睇,又會覺得劇情唔錯。

Florence 黎凱欣 said...

駒, 我還未看戲啊, 謝謝你的意見。反正在竊聽上, 資料搜集做到足, 如果在財經資料上也做多點功課, 那就更完美了。

Related Posts Plugin for WordPress, Blogger...