我會做好呢份工???

「我會做好呢份工 (I'll get the job done)！」。曾蔭權的競選口號，今日宣布。

編輯室七嘴八舌，由報章副主筆湯臣兄帶領下，一致將這句口號理解為：喂，我打份工咋，你地要雙普選，要唔拆皇后碼頭，爭唔到唔好話我，我都要睇老細面色架。

這一句，真絕妙。若事情果真如此，他今日承諾上任便減稅，會唔會過唔到老細那一關呢？

從此，牛頭角清潔大嬸可以話，我會做好呢份工，你唔好壓我價剝削我，曾蔭權唔該你幫手支持吓。

公屋商場小店店員甲可以話，我會做好呢份工，領匯你咪加租，搞到老闆捱唔住要炒我，曾蔭權唔該你出手管吓。

幫襯百佳買油魚痾到成褲油的家庭主婦順嫂話，我會做好呢份工，做家庭主婦都係一份工，唔好油魚當鱈魚都無皇管，曾蔭權唔該你出句聲吖吓。

還是不明白。看看教統局長李國章如何表明「做好呢份工」，想留任的心跡：

「如果梁家傑做特首，佢會炒我魷魚，話有個張文光已經夠。」(摘錄自無線新聞)

學嘢喇。要不，就學梁家傑駁咀：

「香港不是要找一個打工仔，而是有領導才能的特首。」

你想做邊個？又會選邊個？

********

題外話，想看看曾蔭權的競選網頁，怎料在 Google 和 Yahoo 香港搜尋，第一頁也沒有顯示。這麼不顯眼，我懶得找下去，唯有問報章同事，才知道網址是：

曾蔭權選舉辦公室 : http://www.donald-tsang.com

至於梁家傑，輸入「梁家傑特首選舉辦事處」，Google 即時登出連結

梁家傑特首選舉辦事處：http://www.competitionforce.hk

論網頁接觸度，梁家傑稍勝一籌。曾蔭權選舉那個 search 不到的網頁，究竟是誰這麼大整蠱？